أحمد سعد يتحدث عن دور الطبيب النفسي في حياته وسبب رفضه دخول بناته الفن

كشف الفنان أحمد سعد خلال الجزء الثاني من لقائه ببرنامج "معكم"، الذي تقدمه الإعلامية منى الشاذلي، على قناة one، عن تفاصيل حياته الشخصية، وتجربته مع العلاج النفسي، مؤكدا أنه كان يبحث عن ذاته الحقيقية وسط الضغوط الاجتماعية والبحث عن القبول، إضافة الى أبرز التحولات التي عاشها على المستوى النفسي والروحي، مؤكدًا أن رحلته لم تكن سهلة، لكنها شكلته وعلمته الكثير، كما تحدث عن أسباب رفضه دخول بناته الوسط الفني لتفاجئه منى الشاذلي بابنته جودي وهي تغني.

بدأ سعد حديثه، قائلًا: على المستوى الشخصي، كنت حابب جدًا أروح لطبيب نفسي، عشان أكتشف شخصيتي، كنت مش مستمتع رغم إن عندي كل العوامل اللي المفروض تخليني سعيد، لكن كنت تايه ومش لاقي نفسي".

وأضاف: "مكنتش عارف أنا الشخص المتدين، ولا اللي مش متدين، دي طريقتي في اللبس ولا لأ؟.. كانت عندي تساؤلات كتير محتاجة إجابة، وكنت بعيش بشخصية مش بتاعتي عشان أرضي الناس".

وكشف عن أنه من خلال العلاج النفسي، اكتشف واحدًا من أكبر عيوبه: "كنت دايما بحاول أرضي الناس على حساب نفسي، وده خلاني أفقد الاتصال بشخصيتي الحقيقية.. وكنت فاكر إن ده اللي هيخليني محبوب، لكنه خلاني تايه أكتر".

تابع: "بسبب شغلي كان عندي حاجة اسمها حب الظهور.. كنت دايمًا بحب أكون في الصدارة، أهزر جامد وأكون الجوكر في أي قعدة، لكن ده دخلني في أزمة حقيقية، وخلاني مش قادر أشوف الحاجات الحلوة اللي عندي".